वि. सं. २०७७ मा नेपाली धितोपत्र बजार बुलिश रह्यो। अर्थात समग्रमा धितोपत्र बजारका लगानीकर्ताहरुका लागि सो वर्ष सुखमय रह्यो। सो वर्ष बजारमा धेरै सकारात्मक परिवर्तन हुनुका साथै नेप्से परिसूचक हालसम्मकै उच्च विन्दुमा पुग्यो।
गत वर्ष नेपाली धितोपत्र बजार धेरै लगानीकर्ताहरु भित्रिए। सो वर्ष बजारमा देखिएको बुलको चमकले धेरै मानिसहरुलाई आकर्षित गर्यो। यससँगै सो वर्षको अन्तिम दिनसम्ममा करिब ३४ लाख डिम्याट खाताहरु खोलिएका छन्।
कोरोना भाइरस संक्रमण जोखिम न्यूनिकरणका लागि गरिएको लकडाउनका कारण लगानीका अन्य क्षेत्रहरु ठप्प भएपछि ती क्षेत्रका लगानी पनि शेयर बजारमा नै भित्रिएको विश्लेषण गरिएको थियो। सोही कारण गत वर्ष नेप्सेमा कारोबार रकमले पनि नयाँ रेकर्ड बनाएको थियो।
मुलुकभर जारी गरिएको लकडाउनले नेपाली धितोपत्र बजारलाई प्रविधिमैत्री बनाउन धेरै हदसम्म सहयोग गरेको लगानीकर्ताहरु बताउँछन्। अहिले अधिकांश लगानीकर्ताहरु अनलाइनमार्फत कारोबार गरिरहेका छन्। यद्यपि, धेरै लगानीकर्ताहरुको आबद्धता र कमजोर प्रणालीका कारण बेला बेलामा लगानीकर्ताहरु समस्या भोग्दै आएका छन्।
गत वर्षको अन्तिम कारोबार दिन नेप्से परिसूचक हालसम्मकै उच्च विन्दु अर्थात २७१४.७९ विन्दुमा पुगेर बन्द भयो। अघिल्लो वर्ष १२५१.४५ विन्दुमा बन्द भएको नेप्से, गत वर्ष कुल ११६.९३ प्रतिशत अर्थात १४६३.३४ अंक बढ्यो। त्यसैगरी, गत वर्ष ९१ लाख २८ हजार पटकको कारोबारमा ८ खर्ब ५४ अर्ब ७२ करोड रुपैयाँ बराबरको २ अर्ब ८५ लाख कित्ता शेयर खरिदबिक्री भएको छ।
गत वर्ष नेप्सेको कुल बजार पूँजीकरण साढे २१ खर्ब रुपैयाँ बढेको छ। अघिल्लो वर्षको अन्तिम कारोबार दिन १६ खर्ब रुपैयाँ रहेको यस्तो पूँजीकरण, गत वर्ष २१ खर्ब ५८ अर्ब रुपैयाँ बढेर ३७ खर्ब ५९ अर्ब पुगेको छ।
गत वर्ष लगानीकर्ताहरु समय समयमा उपसमूह परिर्वतन गर्दै कारोबार गरिरहेको थिए। जसका कारण हरेक उपसमूहमा समय समयमा उत्साह देखिएको थियो। सो वर्ष उपसमूहहरुमा पनि केही परिवर्तन भएको थियो। होटल उपसमूहलाई परिवर्तन गरी होटल तथा पर्यटन उपसमूहको बनाइएको थियो भने लगानी उपसमूह थप गरिएको थियो। सो वर्ष १३ उपसमूहका परिसूचकहरुमध्ये व्यापार उपसमूहको परिसूचक सर्वाधिक ३१७६.२० अंक अर्थात ४१५.८९ प्रतिशत बढेर ३९३९.९२ विन्दुमा पुगेको छ। त्यसैगरी, सो वर्ष अन्य उपसमूहको परिसूचक २०१.३४ प्रतिशत बढेको छ।
कारोबार रकमका आधारमा गत वर्ष नेपाल पुनर्बीमा कम्पनी शीर्ष स्थानमा रहेको छ। सो वर्ष पुनर्बीमा कम्पनीको ४० अर्ब ३० करोड रुपैयाँ बराबरको शेयर खरिदबिक्री भएको छ। त्यसैगरी, नेपाल लाइफ इन्स्योरेन्सको ३९ अर्ब ४३ करोड रुपैयाँ बराबरको शेयर कारोबार भएको छ।
कारोबार संख्याका आधारमा पनि सो वर्ष नेपाल पुनर्बीमा कम्पनी नै अगाडि रहेको छ। सो कम्पनीको गत वर्ष ४ लाख २५ हजार ३६१ पटक शेयर कारोबार भएको छ। त्यसैगरी, नेपाल इन्फ्रास्ट्रक्चर बैंकको सो वर्ष ३ लाख ५० हजार ७०० पटक शेयर कारोबार भएको छ।
शेयर संख्याका आधारमा भने गत वर्ष नेपाल बैंक अगाडि देखिएको छ। सो वर्ष नेपाल बैंकको ५ करोड ४६ लाख कित्ता शेयर खरिदबिक्री भएको छ। त्यसैगरी, प्रभु बैंक, ग्लोबल आइएमई बैंक, कुमारी बैंक र नेशनल हाइड्रोपावरको ४ करोडभन्दा बढी कित्ता शेयर खरिदबिक्री भएको छ।
Comment here